ತಂತ್ರಜ್ಞಾನ ಜಗತ್ತಿನಲ್ಲಿ ಈಗ ಕೃತಕ ಬುದ್ಧಿಮತ್ತೆ ಅಥವಾ ಎಐ ಅಬ್ಬರ ಜೋರಾಗಿದೆ. ಪ್ರತಿಯೊಂದು ಕಂಪನಿಯೂ ತಮ್ಮದೇ ಆದ ಅಥವಾ ಯಾವುದಾದರೂ ಒಂದು ನಿರ್ದಿಷ್ಟ ಎಐ ಜೊತೆಗೆ ಗುರುತಿಸಿಕೊಳ್ಳಲು ಹಾತೊರೆಯುತ್ತಿವೆ. ಆದರೆ ಪಿಸಿ ಮಾರುಕಟ್ಟೆಯ ದೈತ್ಯ ಲೆನೋವೋ ಮಾತ್ರ ಈಗೊಂದು ವಿಭಿನ್ನ ಹಾದಿಯನ್ನು ತುಳಿದಿದೆ. ಸ್ವಿಟ್ಜರ್ಲೆಂಡ್ನ ಡ್ಯಾವೋಸ್ನಲ್ಲಿ ನಡೆಯುತ್ತಿರುವ 2026ರ ವಿಶ್ವ ಆರ್ಥಿಕ ವೇದಿಕೆಯಲ್ಲಿ ಲೆನೋವೋ ಒಂದು ಮಹತ್ವದ ಘೋಷಣೆ ಮಾಡಿದೆ. ಅದೇನೆಂದರೆ ತಾನು ಒಂದೇ ಎಐಗೆ ಸೀಮಿತವಾಗದೇ, ಜಗತ್ತಿನ ಪ್ರಮುಖ ಲಾರ್ಜ್ ಲ್ಯಾಂಗ್ವೇಜ್ ಮಾಡೆಲ್ ಅಂದರೆ ಎಲ್ಎಲ್ಎಂಗಳ ಜೊತೆಗೆ ಪಾಲುದಾರಿಕೆ ಹೊಂದಲಿದೆ ಎಂಬುದು.
ಲೆನೋವೋ ಕಂಪನಿಯ ಸಿಎಫ್ಒ ವಿನ್ಸ್ಟನ್ ಚೆಂಗ್ ಅವರು ರಾಯ್ಟರ್ಸ್ಗೆ ನೀಡಿದ ಸಂದರ್ಶನದಲ್ಲಿ ಈ ವಿಷಯವನ್ನು ಸ್ಪಷ್ಟಪಡಿಸಿದ್ದಾರೆ. ಲೆನೋವೋ ತನ್ನದೇ ಆದ ಎಲ್ಎಲ್ಎಂ ಅಭಿವೃದ್ಧಿಪಡಿಸುವ ಬದಲು, ಆರ್ಕೆಸ್ಟ್ರೇಟರ್ ಅಪ್ರೋಚ್ ಅಥವಾ ಸಮನ್ವಯಕಾರನ ಪಾತ್ರವನ್ನು ನಿರ್ವಹಿಸಲು ನಿರ್ಧರಿಸಿದೆ. ಇದರರ್ಥ ಪ್ರಾದೇಶಿಕ ಅಗತ್ಯಗಳು ಮತ್ತು ಅಲ್ಲಿನ ನಿಯಮಗಳಿಗೆ ಅನುಗುಣವಾಗಿ ಆಯಾ ಭಾಗದ ಪ್ರಬಲ ಎಐ ಮಾಡೆಲ್ಗಳನ್ನು ತನ್ನ ಡಿವೈಸ್ಗಳಲ್ಲಿ ಅಳವಡಿಸುವುದು. ಉದಾಹರಣೆಗೆ ಯೂರೋಪ್ಗೆ ಮಿಸ್ಟ್ರಲ್ ಎಐ, ಚೀನಾಕ್ಕೆ ಅಲಿಬಾಬಾ ಮತ್ತು ಡೀಪ್ಸೀಕ್ ಹಾಗೂ ಸೌದಿ ಅರೇಬಿಯಾಗೆ ಹ್ಯೂಮೈನ್ನಂತಹ ಎಐಗಳನ್ನು ಬಳಸಿಕೊಳ್ಳುವ ಆಲೋಚನೆ ಕಂಪನಿಯದ್ದು.
ಈ ಮಹತ್ವದ ನಿರ್ಧಾರವು ಕೇವಲ ಸಾಫ್ಟ್ವೇರ್ ಒಪ್ಪಂದಕ್ಕೆ ಸೀಮಿತವಾಗಿಲ್ಲ. ಇದು ಜನವರಿಯಲ್ಲಿ ನಡೆದ ಸಿಇಎಸ್ 2026ರಲ್ಲಿ ಪರಿಚಯಿಸಲಾದ ಕಿರಾ (Qira) ಎಂಬ ಕ್ರಾಸ್ ಡಿವೈಸ್ ಎಐ ಸಿಸ್ಟಮ್ಗೆ ನೇರವಾಗಿ ಸಂಬಂಧಿಸಿದೆ. ಪಿಸಿ, ಸ್ಮಾರ್ಟ್ಫೋನ್, ಟ್ಯಾಬ್ಲೆಟ್ ಮತ್ತು ಸ್ಮಾರ್ಟ್ ವಾಚ್ಗಳ ನಡುವೆ ಎಐ ಒಂದೇ ರೀತಿಯಲ್ಲಿ ಕೆಲಸ ಮಾಡಬೇಕು ಎಂಬುದು ಇದರ ಉದ್ದೇಶ. ಬಳಕೆದಾರರು ಒಂದು ಡಿವೈಸ್ನಿಂದ ಇನ್ನೊಂದಕ್ಕೆ ಬದಲಾದಾಗ ಎಐ ಅನುಭವದಲ್ಲಿ ಯಾವುದೇ ವ್ಯತ್ಯಾಸವಾಗಬಾರದು ಹಾಗೂ ಬಳಕೆದಾರರ ಕೆಲಸದ ಸಂದರ್ಭ ಕೆಡಬಾರದು ಎಂಬುದು ಲೆನೋವೋದ ಗುರಿಯಾಗಿದೆ. ಮೋಟೊರೋಲಾ ಮತ್ತು ಲೆನೋವೋ ಬ್ರ್ಯಾಂಡ್ಗಳಲ್ಲಿ ಕ್ವಾಲ್ಕಾಮ್ ಸ್ನ್ಯಾಪ್ಡ್ರಾಗನ್ ಪ್ಲಾಟ್ಫಾರ್ಮ್ ಮೂಲಕ ಇದನ್ನು ಅನುಷ್ಠಾನಗೊಳಿಸಲಾಗುತ್ತಿದೆ.
ಈ ನಡೆಯ ಮೂಲಕ ಲೆನೋವೋ ನೇರವಾಗಿ ಆಪಲ್ನಂತಹ ದಿಗ್ಗಜರಿಗೆ ಸೆಡ್ಡು ಹೊಡೆಯುತ್ತಿದೆ ಎಂದೇ ಹೇಳಬಹುದು. ಆಪಲ್ ಕೇವಲ ಓಪನ್ಎಐ ಅಥವಾ ಗೂಗಲ್ ಜೆಮಿನಿಯಂತಹ ಸೀಮಿತ ಆಯ್ಕೆಗಳನ್ನು ಹೊಂದಿದ್ದರೆ, ಲೆನೋವೋ ಬಳಕೆದಾರರಿಗೆ ವಿಶಾಲ ಆಯ್ಕೆಗಳನ್ನು ನೀಡಲು ಮುಂದಾಗಿದೆ. ಇದರ ಜೊತೆಗೆ ನಿವೀಡಿಯಾ ಜೊತೆಗೂಡಿ ಹೈಬ್ರಿಡ್ ಎಐ ಡೇಟಾ ಸೆಂಟರ್ಗಳನ್ನು ನಿರ್ಮಿಸುವ ಯೋಜನೆಯೂ ಇದೆ. ವಿಶೇಷವಾಗಿ ಏಷ್ಯಾ ಮತ್ತು ಮಧ್ಯಪೂರ್ವ ದೇಶಗಳಲ್ಲಿ ಲಿಕ್ವಿಡ್ ಕೂಲ್ಡ್ ಸಿಸ್ಟಮ್ಗಳನ್ನು ಅಭಿವೃದ್ಧಿಪಡಿಸುತ್ತಿರುವುದು ತಾಂತ್ರಿಕವಾಗಿ ಮಹತ್ವದ ಸಂಗತಿಯಾಗಿದೆ.
ಲೆನೋವೋ ಅಂಬಿಯಂಟ್ ಎಐ ಪರಿಕಲ್ಪನೆಯನ್ನು ಸಾಕಾರಗೊಳಿಸಲು ಹೊರಟಿದೆ. ಅಂದರೆ ಬಳಕೆದಾರರು ಪ್ರತಿ ಬಾರಿಯೂ ಚಾಟ್ಬಾಟ್ ಆಪ್ ತೆರೆಯದೆಯೇ ಎಐ ತಾನಾಗಿಯೇ ಸಹಾಯಕ್ಕೆ ಬರುವಂತೆ ಮಾಡುವುದು ಇದರ ಉದ್ದೇಶ. ಮುಂಬರುವ ಫಿಫಾ ವರ್ಲ್ಡ್ ಕಪ್ 2026ರ ಸಂದರ್ಭದಲ್ಲಿ ಎಐ ಆವಿಷ್ಕಾರಗಳನ್ನು ತರುವ ಯೋಜನೆಯೂ ಇದರಲ್ಲಿದೆ. ವಿಂಡೋಸ್ ಮತ್ತು ಆಂಡ್ರಾಯ್ಡ್ ಎರಡರಲ್ಲೂ ಪ್ರಬಲ ಹಿಡಿತ ಹೊಂದಿರುವ ಲೆನೋವೋ, ಈ ಬಹು-ಮಾಡೆಲ್ ತಂತ್ರದ ಮೂಲಕ ಎಐ ಯುಗದಲ್ಲಿ ಗಟ್ಟಿಯಾದ ಹೆಜ್ಜೆ ಇಟ್ಟಿದೆ. ತಂತ್ರಜ್ಞಾನ ಪ್ರಿಯರಿಗೆ ಇದೊಂದು ಹೊಸ ಮತ್ತು ಸುಧಾರಿತ ಅನುಭವವನ್ನು ನೀಡಲಿರುವುದಂತೂ ಖಂಡಿತ.
ಇನ್ನೂ ಯಾವುದೇ ಕಾಮೆಂಟ್ಗಳಿಲ್ಲ.
ಬ್ರೇಕಿಂಗ್ ನ್ಯೂಸ್, ಟ್ರೆಂಡಿಂಗ್ ಸ್ಟೋರಿ ಆಳವಾದ ವಿಶ್ಲೇಷಣೆಗಳನ್ನು ನಿರಂತರವಾಗಿ ಪಡೆಯಲು ಉಚಿತವಾಗಿ ಚಂದಾದಾರರಾಗಿ.
